Anuncio da xornada

Xornada acerca da Convención da ONU sobre os dereitos das persoas con discapacidade en Vigo

O vindeiro 27 de maio a Asociación Asistencia Persoal para a Vida Independente, VIgalicia, organizará en Vigo unha Xornada sobre a Convención das Nacións Unidas sobre os Dereitos das Persoas con discapacidade.

A sede da Fundación Pedro Barrié de la Maza en Vigo (Policarpo Sanz, 31) será o lugar escollido para levar a cabo esta iniciativa.

A citada xornada contará coa presenza de destacados conferenciantes dende o eido académico como poden ser as Profesoras de Dereito da Universidade da Coruña, Adela Rey e Marta Núñez.

Do mesmo xeito tamén acudirán algúns dos máis importantes expertos do Movemento de Vida Independente a nivel nacional como son Antonio Centeno e José Antonio Nóvoa.

Ademáis este evento servirá para que persoas relacionadas coa diversidade funcional de maneira directa nos relaten en primeira persoa os seus “Testemuños dende a Experiencia”.

Así a membro do Foro de Vida Independente e de VIgalicia, Marita Iglesias, e Elena Piñeiro de Hoy por Mañana abrirán estes testemuños. Os seguintes en tomar a palabra serán María Cruz da Silva, Mónica Sumay e Cecilio García que tratarán sobre as súas vivencias como pais de nenos con diversidade funcional.

Estas xornadas forman parte dunha campaña de difusión da Convención iniciada o pasado mes de xaneiro en Santiago de Compostela e que tiveron a súa continuidade os días 2 e 3 de a abril en A Coruña.

Ao longo desta campaña expuxéronse algúns aspectos fundamentais deste tratado de dereito internacional como é o feito de que as persoas con diversidade funcional son suxeitos de dereito e non obxectos de políticas caritativas e que, polo tanto deben ter os mesmos dereitos, opcións e control sobre as súas vidas que os demais cidadáns.

A Convención Internacional sobre os Dereitos das Persoas con discapacidade aprobouse o 13 de decembro de 2006 pola Asemblea xeral das Nacións Unidas. Esta Convención é o resultado dun longo proceso, no que participaron varios actores e entre os que tiveron un papel destacado as organizacións de persoas con diversidade funcional e as súas familias.

Este novo instrumento supón importantes consecuencias para as persoas con diversidade funcional. Unha das principais será a “visibilidade” deste grupo cidadán dentro do sistema de protección dos dereitos humanos de Nacións Unidas, a asunción do fenómeno da diversidade funcional como unha cuestión de dereitos humanos, e poder contar cunha ferramenta xurídica vinculante á hora de facer valer os dereitos destas persoas.

O Estado español, asinou e ratificou a Convención da ONU e o seu Protocolo Facultativo, que abre unha nova vía de reclamación dos dereitos, entrando en vigor no noso país dende o pasado día 3 de maio de 2008. A partir desa data, a Convención pasa a formar parte do ordenamento xurídico español e é invocable ante as autoridades políticas, xudiciais e administrativas.

Por todo isto, invitámolos a acudir a esta Xornada sobre a Convención das Nacións Unidas acerca dos Dereitos das Persoas con Discapacidade.

Programa

Organiza: Vigalicia.

Colaboran: Fundación Barrié, Foro de Vida Independiente, DerechosHumanosYa.org.

Entidades organizadoras e colaboradoras

Este sitio utiliza cookies propias e de terceiros. Se segues navegando considérase que aceptas a política cookies. Máis información

As opcións de cookie neste sitio web están configuradas para "permitir cookies" para ofrecerche mellor experiencia de navegación. Se segues utilizando este sitio web sen cambiar as opcións ou premes en "Aceptar" estarás consentindo as cookies do sitio. Aviso legal

Pechar