Martina González Veiga

Martina González Veiga: “hai que ver as persoas con diversidade como suxeitos sexuais”

Como directora do centro de sexualidade Con mucho gusto!, Martina González Veiga achegase á vida sexual de xeito natural e vendo a diversidade como unha oportunidade no canto de ver as nosas circunstancias como un problema.

Dende o seu programa na Radio Galega, Gónzalez Veiga, normaliza o feito de falar de sexo. Nesta entrevista seguimos a mesma senda e poñémoslle voz ás súas reflexións.

Martina, dende a túa opinión, a que se debe que a sexualidade e a diversidade funcional sigan a ser case que temas contrapostos a estas alturas do século XXI?

A que as cousas non mudaron tanto como as veces pensamos: os medios de comunicación seguen a perpetuar unha idea da sexualidade xenital, heterosexual, normativa, transmítennos modelos ríxidos de como son as mulleres e os homes desexables; seguimos tendo dificultades para entender a diversidade de calquera tipo, e moito máis a sexual; seguimos sen recibir unha educación sexual de calidade ao longo da nosa vida.

É preciso que se visibilicen ás persoas con diversidade funcional como persoas desexantes e desexables, que se faga patente que este modelo normativo de como temos que ser non lle vai ben a ninguén, que so é xerador de problemas. Que todo ser humano é sexuado e ten dereito a vivir a súa sexualidade como queira, dende a liberdade que da o coñecemento, e que as persoas con diversidade funcional teñen dereito a que se lles proporcionen tódalas ferramentas necesarias para vivir a súa sexualidade de xeito pleno e satisfactorio.

Sempre que se fala de “integración” faise referencia ao acceso ao mercado laboral, á educación, á accesibilidade… Como é posible que ninguén pense na sexualidade como un punto fundamental da vida das persoas?

Probablemente porque fai falta derribar moitas barreiras mentais. Segue a haber moitos clichés e mitos en relación as persoas con diversidade funcional, as veces parece que flota no aire un estraño medo a abordar o tema, e parece que si non se toca non existe. A moitos profesionais resúltalles complicado falar de sexualidade, topamos coas propias actitudes, cunha carencia formativa e co “edúcate como poidas”.

Con demasiada frecuencia cando se trata a sexualidade, se fai dende as disfuncións, infeccións, embarazos non desexados, en definitiva, dende os problemas. Cando a sexualidade forma parte do que somos, e como nos vivimos e relacionamos é unha parte fundamental do noso benestar, esquecemos que se pode aprender a vivir máis plenamente, a gozar, a relacionarse de xeito positivo, a quererse ben.

Dende a sexoloxía estamos a traballar para que isto mude, e creo que as cousas están cambiando, para mostra estas xornadas.

Como vimos nesta xornada, noutras partes do estado español, estanse a por en funcionamento iniciativas que buscan o empoderamento das persoas con diversidade funcional no ámbito da sexualidade. É preciso levar a cabo este mesmo proceso en Galicia. Crees que se poderá acadar este obxectivo tras tanto tempo de ocultar a nosa existencia sexual?

Creo que se está a sementar algo tan potente que so pode xerminar e para ben.

Quen imaxinaba fai uns anos que tería lugar esta Xornada nunha Universidade galega? O debate está servido, e é importante que exista, e que interveñan tódalas partes implicadas en que os dereitos sexuais das persoas con diversidade se respecten. E o máis importante que se visibilice e se de voz a tódalas persoas cuxos dereitos sexuais son ignorados e vulnerados.

Sí, é preciso empoderar as persoas con diversidade funcional en Galicia, e proporcionarlles os recursos necesarios para que poidan vivir a súa sexualidade de xeito pleno e satisfactorio, porque é un dereito que se está vulnerando.

Unha das túas múltiples facetas e a de comunicadora a través da Radio Galega. Soe a xente con diversidade funcional expoñerche as súas inquietudes a través deste medio ou segue sendo un especie de tabú abordar abertamente cuestións relacionadas coa nosa sexualidade?

Falar de sexo segue sendo unha das maiores dificultades coas que nos atopamos, e isto é tamén así para as persoas con diversidade funcional. Estou convencida que cunha comunicación axeitada sobre estes temas, desaparecerían moitos problemas e dificultades. De aí que para min a divulgación sexolóxica sexa un piar fundamental do meu traballo, e o que lle dedico unha parte importante do meu tempo. Temos máis e-mails que chamadas, hai que ir rompendo o xeo. Chégannos mensaxes de persoas que escoitan o programa e que nos comentan que lles axuda que se fale de sexualidade de xeito natural e profesional nun medio público. Falando xa estamos derribando barreiras, e cada vez chegan máis preguntas.

É misión tamén dos/as profesionais crear canles de comunicación para que se vaia perdendo o medo a falar.

Intervención de Martina González Veiga Diversidade Funcional e Sexualidades: Unha cuestión de dereitos en la jornada Asistencia sexual. Un dereito para a diversidade funcional

Autor: Carlos Pampillón

Este sitio utiliza cookies propias e de terceiros. Se segues navegando considérase que aceptas a política cookies. Máis información

As opcións de cookie neste sitio web están configuradas para "permitir cookies" para ofrecerche mellor experiencia de navegación. Se segues utilizando este sitio web sen cambiar as opcións ou premes en "Aceptar" estarás consentindo as cookies do sitio. Aviso legal

Pechar